د اسلام د مقدس دين د اساساتو خپرول د غربي فرمايشاتو په امر سره بند او د حکومت د پاليسيو په وړاندي مردود ګڼل د هغه کړنلارو نمايندګي کوي کوم چي د ابر قدرتو له لاسه د خپلي ګټي په خاطر مينځ ته راغلي دي.

درې يم مثال:

د اسلامي عقايدو او ايمان په درلودلو سره د غرب يا پردو متجاوزو په وړاندي عکس العمل د طالب، القاعده، سخت دريځ،تندروان او دهشت ګردو په نوم سره يادول د هغه ملکونو کار دى چي د خپلي آزادى څخه لاس په سر او د غرب  په رڼا کښي خپل ژوند د سوى په شکل ويني.

دا ټوله مضبوط مثالونه په دې اراده ذکر شول چي د ننني استعمار د پاره ميډيا هم خپل رول اداء کولاى شي او په خپل وخت کښي په کار اچول کېږي د تقديم په خاطر.     

·           ٣_ د سازمان ملل د تعزېراتو پرېکړو ته هڅونه.

په درې يمه درجه کښي  ابر قدرتونه د همدې لاري څخه  کار اخلي ځکه د يوه ملک د اقتصادي نظام د تضعيف او سرټيټولو د پاره يوه غوره لاره دا هم ده چي د ملل متحد د امنيت د شورى له لاري په نوموړي ملک باندي اقتصادي تعزېرات ولګوي ځکه ملل متحد د امريکې تر مستقيمي ارادې لاندي کارکوي او د امتېاز درجه يې يوه د وېټو او بله د همدې ملل متحد انسجام ته د سپورټ اوساتني تګلاره ده يعنې که د وېټو لاره پرې بنده شوه د خپلي بلي امتېازي لاري څخه ګټه ورته حاصله ده چي هغه کولاى شي د ملل متحد چوکاټ ته په خپله خاوره کښي د تضمين او مالي مرستي په نه ورکولو سره و هڅوي د امريکې د خاوري څخه ووزي او دا خبره په خپل بش د عراق په خاوره د حملې کولو په اراده څرګنده کړه او د ملل متحد اداره ته يې په مستقيم پيغام سره دا روښانه کړه چي که د امرکايي دفاع په نامه په مقابله کښي خنډ شي د خپلي دوهمي امتېازي ګټي څخه به کار واخلي.

خو روسان د دوهم امتېاز څخه بهره نه لري او يوازي د وېټو حق يې ځانته حاصل کړيدى.

د مثال د پاره:

په دې خاطرچي غرب په افغانستان کښي د طالبانو حکومت نسکورکړي د سازمان ملل په تعزيراتو سره يې د هواي او ځمکني محدوديت په وضع کولو سره ټاپه ولګول يعنې د ملک څخه د باندي نه هواي پرواز کېدى او نه هم د کومک او خيريه مرستود پاره کوم ملک خپل زړه ښه کاوه، په دې ښه پوهېدل چي حکومتي چارواګي هيڅکله د غذايي موادو سره نه موخه کېږي ځکه حکومت د خپلي بقا دپاره د هري ممکنه لاري څخه ګټه اخلي څو د هغه اردو او پوليسي نظام غښتلى پاتي شي خو بد بختي په عوامو کښي لوېږي او د دې خبري په پوهېدلو هيڅ بشري ملک خپل غوږ نه ګراوه.

دوهم مثال:

د ايران د اټمي بټيو د جوړولو په سر د غرب جنجال د سازمان ملل په چوکاټ کښي د اېران په ملي بانګ باندي دانجماد نقطه او د هغوى د منابعو څخه د ګټي د نه اخيستلو پرېکړي.د عالي رتبه فرادو په ويزو باندي د سره ليدنه او نوري هغه خصمانه تګلاري چي تاسو يې نن ورځ په رېډيو او تلويزيونونوکښي ګورى او اورى يې.

درې يم مثال :

د اسلامي مبارزينو د تګلاري په وړاندي د غرب له لوري د ملل متحد په چوکاټ کښي د مالي منابعو کنګال او د تجارتي بازار د بانکونو په منجمد کېدلو سره د همدې مبارزې تضعيف.       

په همدې ډول په سل هاو نور مثالونه چي د ملل متحد په چوکاټ کښي د سياسي اهدافو په تکميل خپل رول لوبوي.

·           ٤_ د ديپلوماتيکي اړيکوشلول.

دا هم يوه بله وسله ده چي د ابرقدرتونو له لوري  د تحميل ځاى نيسي په دې برنامه کښي هغه ملک چي  د تسخير د پاره يې سترګي پټي شوي دي په دې او هغه بهانې سره د نورو ملکونو څخه تجريد کېږي يعنې څوک ورسره ديپلوماتيکي اړيکي نه ټينګوي يا داسي چي د خپلو سفيرانو تبادله ور سره نه ټينګوي ، له همدې امله د مرستو او بشري کومکونو لړۍ پرې بنده ساتل کېږي او د تجارت په برخه کښي د وېزې آسانتېاوي د بل ملک د ورتللو په خاطر پرې بندي کېږي اقتصادته  سخت  تاوان رسېږي او ملک د نړۍ څخه ليري اومنزوي پاتي کېږي دا کار هم د ملل متحدپه سر د خيانتي دسيسې په تاثر کښي تپل کېږي  او د يوه ملک رسمي حالت په نظر کښي نه نيول کېږي او داسي څرګندوي چي د انحلال لياقت لري.

نور بيا